ام محمد:اقول حبيبتي شذى خلصتي محمد اخوك تحت ينتظرك عشان تدخلين تشوفين تركي...
شذى برعب: لا يمه باقي ما خلصت انتظري شوي...
وقتها تشيل ريم صديقة شذى ريم بنت محمد:احلى ما فيه هالبنت اسمها ...تهبل يا شذى طالعه علي...
شذى: طالعه عليك إلا على اخوي محمد يا الذكيه...
ريم تبي تلطف الجو: لأنها ماخذه نفس اسمي عرفت ليش؟؟؟
ابتسمت لها شذى ابتسامه سريعه وقالت لأمها: يمه ما ابي اشوفه خلاص هونت...
ام محمد باستغراب: إيش هونت؟؟؟....
شذى برعب:إيه هونت خليه يرسل صورته وانا بشوفها...كذا احسن...
ريم: هين انتي توافقين عليه...بس المشكله هو رح ينصدم يوم العرس لمن يشوفك...
شذى بضيق: كلي تبن زين...
ام محمد: شذى بلا دلع البنات ذا وقومي معي...ولا ترا انادي لك ابوك ياخذك...
مها: شوي شوي عليها ياخاله...كل البنات كذا...((وتلف على شذى)) شذى ليه ما تبين تدخلين؟؟؟....
شذى: مها تدرين إني ميته رعب وانا ما دخلت...فما بالك لو دخلت اتوقع يغمى علي من الخوف...
مها وهي ماسكه يدين شذى وتبي تطمنها: كل البنات كذا وبعد الزواج تتذكرين نفسك وصدقيني بتضحكين عليها...
شذى: ولو احس انا غير...... ما أدري لأني لا اعرفه ولا هم يحزنون...
هنا رق قلب ام محمد على وحيدتها فلمتها بحظنها وقالت: سمي بالرحمن ياشذى وتوكلي على الله واخوك محمد بيكون معك
شذى:ما ادري شأقول يمه ....
ام محمد: زين يالله نزلي معي.....
شذى بتوتر: زين يمه بس اعدل نفسي و انزل معك...
ام محمد: وطول الوقت اللي فات وش تسوين؟؟؟....
شذى: اجهز نفسي....
وراحت شذى لعند التسريحة وتعدل نفسها....
ريم: لا تحاولين يا شذى خايسه خايسه........
شذى: بعينك خايسه........
مها: لا تخافين تمزح والله تهبلين.......
وشذى وهي طالعه مع امها: اعرف ريم ومزحها....
وهنا تشد ريم شذى من يدها وتقول لها بصوت واطي: اقول شذى هالله هالله بالقز قزيه من راسه للرجوله زين؟؟؟....
شذى تفكها وتقول:زين إذا قدرت اشوف...تبيني اقز....
ونزلت شذى مع امها.....
ريم: تتوقعين يا مها ان تركي حلو؟؟؟........
مها: ما ادري......
ريم: زين ما سألت خالد زوجك؟؟؟........
مها باستغراب: اساله عن إيش؟؟؟؟....
ريم بضيق:إذا تركي حلو او لأ.....
مها بابتسامه: تتكلمين من صدقك انتي،عشان خالد يذبحني...
ريم:ليـــــــــه؟؟؟...
مها:لأنه زوجي وبيغار علي منه....
ريم بمزح: اموت بالغيره انا....
مها:إيه خليك كذا بنت مؤدبه...
وضحكت ريم من كلام مها...
وقعدت ريم ومها فوق بغرفة شذى يسولفون....
.................................................. .......................
بالمجلس عند الرجال كان جالس تركي وابوه ابو بندر وابو محمد وعياله كلهم محمد وخالد و سعود ...
ابو بندر: وإذا ما عندكم مانع يابو محمد نبي تركي يشوف بنتكم ؟؟....
ابومحمد:ابد ما عندنا مانع...وهذا من حقه إنه يشوفها لو يبي ألحين......
ابو بندر:تسلم يابو محمد...
ابو محمد: ابد يابوبندر ما جبنا شي من عندنا هذا من الدين والسنه....
ابو بندر: اصيل وتعرف الأصول يابومحمد...وماعليك امر لو يشوفها ألحيـــن....
ابو محمد:مايامر عليك عدو....وشوف يا سعود لتركي طريق عشان يشوف اختك...
سعود:تامر يباه...((ويلف على تركي ))وحياك ياتركي معي...
تركي بابتسامه:الله يحييك....
ويقوم سعود من المجلس ومعه تركي للمجلس ثاني بجنب مجلس الرجال عشان تركي يشوف شذى وتشوفه.....
.................................................. ......................
بالمجلس الثاني....
سعود لتركي: حياك يا تركي البيت بيتك...
تركي: الله يسلمك...
ويروح تركي يجلس بالمجلس ويدخل سعود ينادي أخته....
تركي بخاطره((يارب اكتب لي الخير ووفقني باختياري))...
ويقعد تركي يحاول يرسم صورة تقريبيه عن شذى من خلال وصف خالته عبير لها.......
.................................................. ................................
سعود: اقول شذى يله قدامي بسرعه.....
شذى بخوف وهي متمسكه بأمها: يماه خايفه تعالي معي...
سعود يقلدها:يماه خايفه تعالي معي....اقول انتي هي بلا دلع يلا امشي قدامي انا اللي بدخل معك...
شذى متفاجأه: انت؟؟؟؟.........ليه وين محمد وخالد؟؟؟....
سعود يخزها: مع ابوي بمجلس...ليه انا مهوب عاجبك يا آنسه شذى؟؟؟.......
شذى: بصراحه انا كان ودي محمد او خالد....كبار ويعرفون بهالسوالف مهوب انت بزر باقي....
ام محمد: لا سعود فيه الخير والبركه....
سعود يعصب من كلام اخته ويقرب منها ويمسكها مع شعرها ويجرها على فوق إلى ما وقفت على اطراف اصابيع رجلها...
سعود بمكر:تبيني أدخلك يا شذى على تركي كذا???????...
ام محمد: سعود فك اختك....
شذى:آآآي....سعود حرام عليك فكني احس خلاص شعري بيتقطع في يدك...آآآي حشى هذي مو يد انسان...
ام محمد تفك شذى من سعود: سعود بس اترك اختك هذا بدال ما تطمنها...
سعود: امزح يمه معها وش فيك....
شذى وهي تعدل شعرها ونفسها: ألحين انت تمزح انت ووجهك؟؟؟...هذا وقت مزح...
سعود بابتسامه:وش رايك بمزحي حلو خفيف صح؟؟؟....
شذى بطنازة: إيــــه مزحك مووووت خفيف...
سعود:أوووووه نسيت الرجال بالمجلس...يلله شذى امشي معي...
شذى: يلله هذا انا معك...
ام محمد:الله يكتب لك الخير كله ياشذى...
سعود:الله عليك يماه تبين الخير كله لشذى وتنسين عيالك ...
ام محمد: كلكم يا سعود ولا تزعل...
سعود: اقول شذى يله ابطينا على الرجال بالمجلس...
وتمشي شذى مع اخوها والخوف متملك قلبها.................................
.................................................. ....................................
......:شذى حبيبتي تراه انسان مثلنا ما ياكل آوادم ...وش اللي يخوفك منه؟؟؟......
شذى وهي واقفه عند الباب:...انت ماتفهم خايفه...
سعود: اقول والله لو ما تمشين لأجرك بشعرك مثل قبل شوي احذفك عنده داخل...
شذى بنظرات حقد:.............
سعود بضيق:لنا ساعه عند الباب ليه ما تدخليــن؟؟..
شذى بعد ماجمعت باقي قوتها: يلله ادخل توكلنا على الله...
سعود:إيه خليك كذا....
ودخل سعود ومعه شذى اللي تمشي بخوف وارتباك....
سعود: حياك يا بنت فيصل...
ولما شاف تركي سعود وهو داخل وكان وراه طيف امرأه ما لمحها زين وقف...
سعود: ارتاح يا تركي...هذي اختي شذى...
وقعد تركي وسعود...وراحت شذى وقعدت بجنب اخوها سعود وهي عيونها بالأرض ماهي قادرة تشيلهم...
تركي:شخبارك يا شذى؟؟؟...
شذى بارتباك: بخـير....
وقعد تركي يقز بشذى ويناظرها...
تركي وهو ما شال عينه من شذى:شخبار الدراسه معك يا شذى؟؟؟...
شذى: بخيـر...
تركي يسألها:انشالله ناجحه هالسنه؟؟؟...
سعود يتدخل: من هالناحيه لا تخاف بالدراسه مصريه شذى...
تركي بابتسامه عريضه: صدق يا شذى اللي يقوله أخوك سعود؟؟؟....
شذى بخاطرها((هين يا سعود تقوله إني انا مصريه وتفشلني خل الناس تروح ويصير خير))وكل هذا وهي ما رفعت عيونها...
تركي: هاه شذى انتي بالدراسه مصريه ولا إيش يقصد سعود؟؟؟...
شذى بخجل: يبالغ سعود.....مهوب للدرجة المصريين عاد...
وقعد تركي وسعود يضحكون عليها....
و قعدت شذى تفكر((مشالله على الأخ تركي طايح فيني قز من أول مادخلت وانا ما لمحت شي منه غير ثوبه ياربي ابي اشوفه))
وقعدت تقول بخاطرها((لازم ارفع عيني واشوفه هالرجال باعيش معه طول عمري يارب عطني الشجاعه إني اقدر اشوفه واطالعه بس))
تركي حب يحرك الجو شوي وقال:وإذا شذى موافقه علي أباخذها الليله معي الرياض مره وحده وبلاعرس بلازحمه؟؟؟...
من صدمة شذى بهالكلام رفعت عينها وقعدت تطالع فيه من الصدمه...وش هالكلام؟؟؟ حلوة ياخذني بلوشي كذا؟؟؟....
سعود يبي يقهر شذى: وإذا علينا إحنا اهلها ماعندنا مانع....الله يستر عليها...
هنا كل تفكير شذى وقف وقعدت تطالعه وما قدرت تنزل عينها من اللي شافته...
كان حلو ووسيم....كان أحلى مما توقعت بكثير...للدرجه حست إنه هو أحلى منها بواااجد ...وفيه جاذبيه لها مهوب طبيعيه...
تركي بمكر:هاه شذى...وش قلت،سرينا الليله على الرياض؟؟؟...
شذى لا إيراديا: طبعا لأ......وبعدها استحت ونزلت عيونها....
هنا قعد يضحك سعود ومعه تركي على ردت فعلها...
تركي وهو يناظر شذى: لا تخافين امزح معك ومارح تمشين انشالله معي من الشرقيه للرياض إلا بعرس اهل السعوديه كلها تتكلم عنه.
حست شذى من كلامه إنه موافق عليها وراضي عنها....ويبيها...
.................................................. ...........................
بالصاله....
مريم: خالتي...وين شذى من رجعت ما شفتها؟؟؟....
ام محمد:اول ما دخلت طلعت فوق لغرفتها عند ريم صديقتها...
مريم: ومها وين؟؟؟....
ام محمد:مها قاعده تكلم أهلها داخل من الجبيل...
مريم منقهره: وشذى بتقعد طول اليوم كذا بغرفتها؟؟؟....
ام محمد: براحتها....هي دخلت وطارت على فوق حتى ما اعطتني فرصة اكلمها وسألها....
مريم:أكيد بتقول البير وغطاه لريم...مشالله ريم كل شي تعرفه...
ام محمد تبي تسكتها:صديقتها ورفيقتها...إذا ما قالت لها بيتقول لمن؟؟؟....
مريم تبي تشعلها:لك انتي...امها....
ام محمد:في الليل لمن الكل ينام اروح لها بغرفتها وتقول لي عن كل شي بعيد عن الزحمة....
مريم:.......................
.................................................. ............................
.......:ريم يجنن يجنن يجنن....
ريم بحماس: يجنن...من هذا تركي؟؟؟....
شذى:إيه....أجل مين يعني مثلا سعود؟....
ريم:ماعلينا من سعود..... وش رايك فيه؟؟؟.........
شذى متحمسه:الصراحه احلى مما توقعت جميل ووسيم ياريم للدرجه ما توقعتها...
ريم: يعني أحلى من اخوك سعود؟؟؟
شذى: مافيه مجال للمقارنة أحلى بمليووون مرة...
ريم: يعني مثل خالته عبير؟؟؟؟
شذى بحماس:أحلى احلى.....
وتكمل شذى كلامها:تصوري ياريم أحلى مني....
ريم: من جد تتكلمين؟؟؟....
شذى: والله العظيم احلى مني وانا ميتة خوف...
ريم: من إيش خايفة؟؟؟......
شذى:إنه يرفضني لأنه أحلى مني...
ريم:........................................
شذى:انا حسيت من كلامه إنه راضي عني ويبيني بس خايفه....
ريم :شوفي شذى انا ما بطلع من عندك إلا وقلتي لي وش صار من طلعت من الغرفه إلى ما رجعتي لي ألحين...
شذى: تآمرين آمر....
وقعدت شذى تحكي للريم من اول مانزلت إلى ما جا اخوها سعود و وسالفتها معه إلى ما رجعت يعني من طقطق إلى السلام عليكم...
.................................................. ...........................................
وبالليل بالفندق.....
كان تركي وابوه ابوبندر حاجزين جناح كامل لهم بفندق الميريديان....
تركي:هلا يباه....وش بغيت؟؟؟...
ابو بندر:سلامتك يا تركي....بس بغيت أسألك وش رايك بالجماعه اليـوم؟؟؟...
تركي : انت قول رايك بالأول يابو بندر؟؟؟ .....رايك يهمني؟؟؟....
ابو بندر:الصراحه ما توقعت إنهم كذا؟؟؟..مشالله عليهم شكلهم رجال أصول و يعجبونك...
تركي وكأنه ارتاح من كلام ابوه: حتى انا يابوبندر مثـــلك...اعرفهم ....ناس حسب ونسب...وطلعوا بعد اصحاب شهامه وخير
ابو بندر: انا في البدايه كنت متردد...بس ألحين توكلنا على الله...
تركي:يعني افهم من كلامك يايباه انهم عاجبينك ....وموافق عليهم....
ابو بندر:لو كنت رافض ماكنت جيت معك وخطبت لك...بس انا اقول إني متردد وكنت ابي اللي يريحك...
تركي وهو يبتسم لأبوه: طول عمرك يابو بندر حكيم وصاحب كلمه وانا ما اخترت هالعائله إلا لمن سألت عنهم وجاني اللي يسرك...
ابو بندر: وانت يا تركي يوم شفت البنت...اعجبتك؟؟؟...
تركي بابتسامة رضى:الصراحه يباه ارتحت لها مبين انها حبوبه...
ابو بندر: ومزيونه؟؟؟....
تركي بثقه:أكيد...لو خايسه ماخذيتها...
ضحك ابو بندر من كلام ولده وقال: تركي ترى الجمال مو اهم شي ...الجمال يروح...وتبقى الأخلاق والعشرة الحسنه...
تركي: وانت صادق...
ويزيد ابو بندر:جمال الوجه بتمل منه بعد شهر شهرين...سنه سنتين...ومايبقى من زوجتك إلا عشرتها الحسنه...
تركي وهو مقتنع:معك حق يباه..بس ترى انا ماكنت ادور على الجمال لوحده لو كنت ابي وحده حلوة يا كثرهم بنات اقاربنا...
ابو بندر وهو منتبه...
تركي يكمل كلامه:بس انا كنت ابي وحده مميزه في كل شي وبكل شي وتكون حبوبه....وجذابه...
ابو بندر: وبعدين....
تركي: المهم هذا الكلام قلته لأمي وفاطمه اختي وخالتي عبير وعمتي حصه، في البدايه كان يقولوا لي عن بنات اقاربنا وحده وحده
بس انا مافيه وحده داخله مزاجي بنات اخوالي...بنات اعمامي...بنات صديقات امي...الجيران...ولا وحده....
انتبه تركي لنظرة ابوه المستغربه له... وفهم قصده...
تركي: وقالوا لي سلمى...بس سلمى خلاص ماصرت أبيها مثل اول...صدق كانت تشد انتباهي بس هذا من زمان قبل 8سنين واكثر..
ابو بندر: بس كنت يا تركي تبيها وتبكي علشانها والدنيا كلها بكوم وسلمى عندك كوم ثاني...الصراحة ماتوقعت تاخذ غيرها...
تركي:هذا الكلام يوم كنت بالثانوي وقبل لا ادخل العسكريه يباه هذا حب مراهقين وكنت احبها لأنها الوحيده اللي في عمري من
اقاربنا وهي اصغر مني بسنه...وكانت هي الوحيده اللي اشوفها قدامي...بس الحين انا اعتبرها مثل اختي بشاير وبس مو أكثر...
ابو بندر: سبحان اللي يغير ولا يتغير....
تركي حب يغير السالفه: بس يباه انا مستغرب من شي ليه ماخليت امي تجي معنا...
ابو بندر: انا قلت هالمرة رجال...وإذا فيه نصيب المرة الثانيه تجي معنا...
تركي: وانت صادق...بس مسيكينه كانت تبي تشوف العروس...
ابو بندر بابتسامه:من ألحين عروس...
تركي:أكيــــــــد...هي تطول تركي...
وهنا دق جوال تركي...
تركي:هلا...هلا بخالتي عبير........انا........اوكيه..........زوجك وين..........نص ساعه واجيك.....يالله في امان الله...
ابو بندر:مين؟؟؟....خالتك عبير....
تركي:إيـــــــــــــه يباه......شكلك يباه تعبان تبي تنام...
ابو بندر:إي والله تعبان وهلكان ودي انام...
تركي:أجل انا استأذن يباه بروح لخالتي عبير الحين...
وناظر ابو بندر الساعه وقال:بس الحين الساعه11وين تروح وزوجها بيكون نام...
تركي وهو قايم: هي عزمتني...وسألتها عن زوجها قالت نام من الساعه ثمان وهي عازمتني على سهره عندها لما عرفت إن رحلتنا بكره
ابو بندر: خلاص...بس لا تتأخر تدري ...سبع الصبح وحنا بالمطار...
تركي:لا توصي حريص....تآمر على شي؟؟؟....
ابو بندر وهو رايح لفراشه: ابد....سلامتك...
تركي:مع السلامه ...
ابو بندر: في حفظ الله...
ويطلع تركي من غرفة ابوه ويروح لغرفته يعدل نفسه ويلبس ثوبه...و خطرت على باله شذى وابتسم لما تذكرها...
هو صح توقعها أحلى من الواقع بكثيــــــر...بس دخلت مزاجه وبقوووة بعد...حس إنها جذابه اكثر مما هي حلوة
"الله يهديك يا عبير عليك مبالغات في شكلها مهيب طبيعية" وابتسم لما تذكر كيف صورتها خالته في باله ملاك مامثلها في البشر
صدق انها حلوة...بس مومثل وصف عبير لها...بس شافها تناسبه ولايقه له....
وبعد كذا طالع الساعه إلا شاف نفسه تأخر على خالته اللي ساكنه بالمباركيه واللي تنتظره.........
تحيـــــــــــــــــــــــــــــــاتي لكم
اتمنى اشوف الردود اذا عجبتكم راح اكملها لكم ..
انشاء الله تعجبكم