مبســــــــط عيســــــــى ...

هذي بعض الصور الشعبيه في الايام القديمه ... لأجدادنا واهالينا رحمة الله عليهم

عيسى عـنده مبسط ... تدرون وش يبيع فيه ؟ شويت قراشيع ..

غضاير ام كوير ، قدور بعضها معفّط ، مسحاة؟ ، تنك تمر ( حويل ) ماتاكله الغنم نفيع ، طواقي زريها منقوض ، بوالطو ـ مدري من وين جمعها ، روادو ماتشتغل ، حتى امواس الحلاقه المثلّمه عنده ؟! كل مالقا شي طايح شاله وبسط بـــه .

مشكلته ماعنده محل .. كل يوم له قرنه واذا عزّل ضفّ قشّــه وقعد يحايل راعي المحل اللي بسط جنبه : تكفى يافلان ابحطّ قشّي عند تكانك .. وابغطّيه الين باكر ..

هذا شغله وهذي بضاعته اللي تزود ماتنقص ... يبوبز الزبون قبال قشّه ويقلّب في هالحوســه وكل ماشال غرض عطاه عيسى له سعر ويقعد يخفّض وهذا سافهه ثمّن يروح ويخلّيه . ويلاحقه عيسى بعيونه وهو يصوّت عليه : ايــه اللي مايعرف للصقر يشويه .. وش يدريك عن الزين ؟.

عيسى مايحرص على البيع حرصه على مبسطه لاتشيله البلديه .. احيانا تلقاه حاطّن نظره بالارض ويهوجس واذا سأله احد : وشفيك ياعيسى ضايقن صدرك ومسهّم .. يقول لك : يخوي حقّون هالبلديّه .. بغثروا كبدي .. تقول ماوراهم الا انا ؟ كل يوم اقعد ادوّر لمبسطي ملفا وراهم مايعطونّي تكان مثل غيري يعني اهل هالتكاكين فيهم زودن عنّي . ؟

واللي مايعرف عيسى .... هو رجالن ارمل .. مرته ماتت من سنتين وتركته لاولد ولا تلد .. يقولون انه مايجيب عيال ... نازلن في بويت طين صغيرن بالمرّه كنّه بيت درجه حجرتين وصهروج بابه ستاره وكل اللي فيه سموّر وسحله ...والسطح يرقا له بسلّــم ولا اشغله الا قطاوة الحاره بعضهن يولّدن في حدا الحجر .. اللي ملاها بالكراتين والكفرات و.. خياش خبزن يابس .. مادري وشو له مجمعه ..

جيرانه ماقصّروا من يوم ماتت حرمته وهم متكفلين بلقمته مازاد عندهم يروحونه له .. وعيسى مايعرف يقول لحد شكرا ولا حتى يدعي على احد ... تمدّ له الشي ياخذه ويسأل : وشذا ؟ والى علّمته انه اكل .. خذه منك وصك الباب دونك وهوساكت .. اللي يجهله يحسبه على قولت القايل : عايل ومستكبر .. لكن هذا طبعه والناس عارفينه ولا يشرهون عليه .

احد الايام عزّل السوق وكان باسطن حول باب المسجد وتوهـــــق بقشّه وين يودّيه ؟ جمّعه فوق بعضه وغطّاه بالبوالطو .. وصلّى المغرب ومشى لبيته .. وخلاّ القش على حطّته . عقب العشا ... اكل باقي غداه وحطّ راسه ورقد ... تالي الليل جاه مغص وقام يتلوّى ويتمسّك في اي شي حوله وحاس نفسه وفراشه واوّل مرّه يدعي على احد : الله لايعيده من اكل ولا من جابه .. ـــ والحقيقه ان الغدا يوم جا الظهر مافيه شي بس هو اللي نساه مكشوف وبيته كله خشاش واكيد انه ملحوس ... اصبح عيسى وجته حمّى وحامت كبده ــ ماغير من فراشه للصهروج .. ولا راح للحراج هذاك اليوم واللي عقبه .. ويوم ثالث حسّ بالنشاط ــ وتذكّر مبسطه .. صلّى العصر وراح ... وقعد يدوّر قشّه مالقاه

دار ودار ثم قعد على عتبة المسيد يتذكر وين كان حاطّه فيه قبل مايصّخن ... مـــرّ عليه القهوجي ( رابح ) اللي يوزع الشاهي والسندويشات على الدكاكين قرب منه وسلم عليه وسأله : عــم عيسى .. ايش فيك ؟

ـــ قشّي مدري وينه

ضحك رابح وقال : كومة الزباله اللي كانت هنا ؟

ـــ ماتخسي .. يالله طس عني .

ـــ هذا شالته البلديه امس .

ـــ وليه يشيلونه يعني مالقوا غير مبسطي ؟

ـــ ياعم عيسى .. قول الحمد لله اللي ريحوك منه من بيشتريه ؟

ـــ رح بس انت وش تعرف غير الشاهي والمرنده .

والتفت عيسى على صفّــت الدكاكين وقال : إنــــــا لله .... هالحين وشلون ابظهره منهم ؟ ياقوم...... وهي عاده الى خذوا شيّن يردونه ؟

وقام من قعدته وهو يحاكي عمره : ماوراهم الا انا .. ياحسافه على ذاك البالطو . ليتني بعته ." تكفي ياجيفنشي " ..

راح عيسى للبلديه وقعد يترجاهم يعطونه قشّه ويحلف انه خلاص ماعادهوب حاطّه في الدرب ..

حقّون البلديه ــ على قولته ــ قالوا له قراشيعك وديناها المحرقه .. واحمد ربك انك افتكيت منها .

طلع عيسى ضايقن صدره ودارت به الدنيا يومنه دوّر عليه في حوش البلديه ومالقاه ...

عوّد للحراج وقعد محله يفكر .... يده على جبهته ومطمبسن براسه ويتذكر كلام موظف البلديه وهو يقول له : قشّك ودّيناه المحرقه ..... انت تعتبر ذاك قشّ ... انت وصخت الرصيف .

والربع في الحراج يمرون ويسلمون عليه من غير مايوقفون : وشلونك ياعيسى ..... حيا الله عيسى ....

واللي بيتطنّز عليه يسأله : وش اخبار المبسط يا عيسى ؟ وعيسى مهوب حولهم .. ولايرد

قعد يجي ساعه و رفع راسه وقام من مقعده .. وراح يسحّب رجلينه لبيته .. عقبها فقدوه اهل الحراج .

بعد كم يوم لقوه . ميــــــــت في بيته . عيال الحلال واهل الخير قاموا باللازم و. دفنوه .

ومحـــــــــد عرف سرّ موتته ؟ يمكن من الغبن عشان البلديه شالت قشّــــه ؟

المهم الناس كل ماجا طاريه دعوا له بالرحمه ... بس ماحد صدق ان سبب الموت ...

يوم شالت البلديّه مبسط عيسى .........

فاصـــــــــــــــله ......

واذا اصـــيب القوم في اخلاقهم فأقــم عليهم مأتما وعويلا

واذا النساء نشأن في امّيـــة رضع الرجال جهالة وخمولا

ليس اليتيم من انتهى ابواه من هــــــمّ الحياة وخلّفاه ذليلا

ان اليـــــتيم هو الذي تلقى لــه امّــا تخــــلّت وابا مشغولا

( احمــــــد شوقــــــي )

ودمتم ........